هل إحنا طموحين فعلًا ,, ولا مش عارفين نرضى؟

هل إحنا طموحين فعلًا… ولا مش عارفين نرضى؟ بنحقق هدف، وبنحط هدف أكبر بنوصل لمرحلة كنا نحلم فيها، وبعد فترة قصيرة بتصير عادية وبنضل نركض وراء الخطوة الجايّة... بس هل هذا فعلًا طموح؟ ولا صرنا مش قادرين نحس بقيمة اللي وصلناله؟ متى بيكون طموحنا رغبة حقيقية بالنمو، ومتى بيتحول لمحاولة مستمرة لإثبات إننا كفاية؟ في اللقاء الأول من «على طاولة دروبنا» رح نفتح حوارًا مختلفًا عن الرضا والطموح، وعن علاقتنا بالإنجاز، والمقارنة، ورغبتنا الدائمة بالمزيد مش جايين نعطي إجابات جاهزة، ولا نقنع بعض بوجهة نظر واحدة جايين نحط أفكارنا وقناعاتنا على الطاولة، ونسأل الأسئلة اللي يمكن ما وقفنا عندها من قبل 🗣️ لقاء حواري مباشر عبر Zoom على طاولة دروبنا… مش كل سؤال لازم تكون إجابته مريحة

• كيف نشارك؟

  المشاركة بسيطة! 🗣️ سجّل من خلال النموذج الموجود في الصفحة، وراح تصلك تفاصيل الانضمام ورابط اللقاء عبر Zoom اللقاء حواري وتفاعلي، بتقدر تشارك برأيك وتجربتك، تناقش أفكار الآخرين، أو تكتفي بالاستماع المشاركة اختيارية، والاختلاف بالرأي مرحّب فيه، والاحترام أساس الحوار

• لمن هذا اللقاء؟

  هذا اللقاء لكل شخص عنده طموح، وبيسعى يحقق أكثر، لكنه أحيانًا بيسأل حاله: إمتى رح أحس إنه اللي عندي بكفّي؟ لكل شخص بيشتغل وبيجتهد، لكن إنجازاته سرعان ما بتصير عادية بعينه ولكل شخص تساءل يومًا إذا كان سعيه المستمر نابعًا من شغفه بالنمو، أو من شعوره إنه لسه ما وصل للمكان اللي لازم يكون فيه مش مطلوب تكون عندك إجابات ,, يكفي تكون مستعد تسأل وتفكر وتسمع وجهات نظر مختلفة

• ماذا نأخذ معنا؟

  رح تطلع من اللقاء ومعك أسئلة أعمق عن علاقتك بالرضا والطموح، ونظرة مختلفة للإنجاز والسعي المستمر رح تتاح إلك الفرصة إنك: - تميّز بين الطموح اللي بدفعك للنمو، والسعي اللي بتحرّكه المقارنة أو الخوف من عدم الكفاية - تعيد التفكير بمفهوم الرضا، وهل هو فعلًا عائق أمام التقدم - تكتشف كيف ممكن تقدّر اللي حققته، من غير ما تتخلى عن رغبتك بالمزيد - تسمع وجهات نظر وتجارب مختلفة توسّع طريقة تفكيرك مش شرط تطلع بإجابة نهائية… أحيانًا السؤال الصح بغيّر نظرتنا لأشياء كثيرة